កញ្ញាឯក សុវណ្ណារ័ត្ន កំពុងកសាងកេរិ៍្តឈ្មោះក្នុងពិភពសិល្បៈ
រាជធានីភ្នំពេញ ៖ កញ្ញាឯក សុវណ្ណារ័ត្ន ក្នុងវ័យ២២ឆ្នាំ ជាអ្នកចម្រៀងនិងសម្តែងកាយវិការខារ៉ាអូខេ និងភាពយន្តនិងជាប្អូនជីដូនមួយតារាចម្រៀងឯក ស៊ីដេ ។ ពេលនេះនាងកំពុងតែប្រឹងប្រែងរះឡើងលើវេហាស៍សិល្បៈ ។
កញ្ញាឯក សុវណ្ណារ័ត្ន បានបង្ហាញខ្លួន និងទឹកដមសំនៀងយ៉ាងពីរោះរណ្តំចិត្តតាមរយៈបទរសប់រាជិ នីសំឡេងមាសរស់ សេរីសុទ្ធា និងបទចម្រៀងថ្មីរបស់កញ្ញាសុខ ពិសី នៅតាមស្ថានីយទូរទស្សន៍នានាជារឿយៗ ។ នាងបានចូលប្រឡូកក្នុងវិស័យសិល្បៈសម្តែង និងចម្រៀងតាំងពីឆ្នាំ២០០០ គឺមកដល់ពេលនេះអស់រយៈពេលជាង១០ឆ្នាំហើយ តែមិនច្រៀងនៅតាមភោជនីយដ្ឋានទេ គឺច្រៀងតែនៅតាមកម្មវិធីជប់លៀង មង្គលការ ឬក៏កម្មវិធីប្រគំតន្ត្រីបែបទេសចរណ៍តាមបណ្តាខេត្ត និងតាមកម្មវិធីទូរទស្សន៍ប៉ុណ្ណោះ ។ ក្រៅពីនេះ នាងចូលរួមសម្តែងកាយវិការខារ៉ាអូខេ ឱ្យផលិតកម្មក្រៅប្រទេស ។
កញ្ញាឯក សុវណ្ណារ័ត្ន ឱ្យដឹងថា ក្រៅពីច្រៀង និងសម្តែងកាយវិការខារ៉ាអូខេ នាងធ្លាប់ចូលរួមសម្តែងក្នុងខ្សែភាពយន្ត ដូចជារឿង «សង្គ្រាមស្នេហ៍» រឿង«តុលាការអាទិទេព» និងរឿង«ចៅស្រទបចេក» ជាដើម ។ ទោះបីជាង១០ឆ្នាំមកនេះនាងមិនទាន់ទទួលកេរ្តិ៍ឈ្មោះល្បី លេចធ្លោក្នុងវិស័យសិល្បៈយ៉ាងណាក៏ដោយ ក៏នាងនៅតែមានចិត្តសប្បាយរីករាយនិងមិនធុញទ្រាន់ សិល្បៈទេ ។ កន្លងមកនាងធ្លាប់មានឱកាសចេញទៅច្រៀងនៅឯប្រទេស ជប៉ុន កាលពីឆ្នាំ២០១១ ហើយក្នុងឆ្នាំ២០១២នេះ កំពុងតែត្រៀមខ្លួនចេញទៅច្រៀងនៅឯក្រៅប្រទេសម្តងទៀត ប៉ុន្តែមិនទាន់កំណត់ថានៅថ្ងៃណាទេ ព្រោះសមាគមនានានៅក្រៅប្រទេសមកទំនាក់ទំនងច្រើន ដូចនេះមិនទាន់សម្រេចនៅឡើយ ។
កញ្ញាឯក សុវណ្ណារ័ត្ន និយាយថា នាងអាចចូលប្រឡូកក្នុងវិស័យសិល្បៈ មិនត្រឹមតែមាននិស្ស័យពីកំណើតទេ គឺនាងបានខិតខំប្រឹងប្រែងហាត់នៅក្នុងក្លឹបសិល្បៈ អស់រយៈពេលជិត១ឆ្នាំ ។ ទោះបីជាយ៉ាងណាក៏ដោយពេលនេះ សុវណ្ណារ័ត្ន បានត្រឹមតែសម្តែងជាតួរងប៉ុណ្ណោះ តែនាងមិនអស់សង្ឃឹមទេ ហើយថែមទាំងកំណត់នៅថ្ងៃអនាគតនឹងក្លាយជាតួឯក និងជាអ្នកចម្រៀងមានកេរិ៍្តឈ្មោះល្បីដូចបងជីដូនមួយ របស់នាងជាក់់ជាមិនខាន ។ ក្នុងវ័យ២២ឆ្នាំតារាចម្រៀងខ្មៅស្រអែមស្រស់ ទឹកមុខញញឹមជានិច្ចរូបនេះអះអាងថា រឿងគូស្រករទុកឱ្យព្រហ្មលិខិតនិងឪពុកម្តាយរៀបចំ គឺមិនយកទេសង្សារ បើយកគឺយកប្តីតែម្តងខ្លាចសង្សារធ្វើបាប ៕
No comments:
Post a Comment