 ក្រសួងកសិកម្មរុក្ខាប្រមាញ់ និងនេសាទ នៅថ្ងៃទី៩ ខែមេសា ឆ្នាំ២០១២ បានបើកសន្និបាតប្រចាំឆ្នាំ ដើម្បីបូកសរុបលទ្ធផលការងារ ឆ្នាំ២០១១ កន្លងទៅនេះ និងលើកទិសដៅសម្រាប់ឆ្នាំ២០១២ លើវិស័យកសិកម្ម។ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន មានប្រសាសន៍ប្រាប់អ្នកកាសែត នាក្រសួងកសិកម្ម រាជធានីភ្នំពេញ នៅថ្ងៃ៩ មេសា ឆ្នាំ២០១២។ នៅក្នុងសន្និបាតនោះ មន្ត្រីជាន់ខ្ពស់បានវាយតម្លៃថា ប្រទេសកម្ពុជា នៅតែមានលទ្ធភាពនាំចេញអង្ករចំនួន ១លានតោននៅឆ្នាំ២០១៥ ខាងមុខ តាមការគ្រោងទុក។ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន នៅថ្ងៃទី៩ ខែមេសា ឆ្នាំ២០១២ បានប្រកាសថា ប្រទេសកម្ពុជា បានប្រមូលផលស្រូវសរុបនៅឆ្នាំ២០១១ កន្លងទៅនេះបានចំនួនជាង ៨,៧លានតោន ប្រៀបធៀបឆ្នាំ២០១០ កន្លងទៅ គឺប្រហាក់ប្រហែលគ្នា បើទោះបីជាគ្រោះទឹកជំនន់នៅឆ្នាំ២០១១ បានបំផ្លាញស្រូវចំនួនជិត ២៧ម៉ឺនហិកតារ។ ចំនួនផលស្រូវនៅឆ្នាំ២០១១ នោះ គឺបានមកវិញ ដោយសារការស្តារកសិកម្មឡើងវិញទាន់ពេលវេលា ក្រោយពីទឹកជំនន់បានស្រក។ នៅឆ្នាំ២០១១ មន្ត្រីក្រសួងកសិកម្ម រុក្ខាប្រមាញ់ និងនេសាទ បានរំពឹងថា នឹងសល់ស្រូវចំនួនជាង ៤,៣លានតោន គិតជាអង្ករចំនួនជាង ២,៧លានតោន។ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន បានមានប្រសាសន៍ប្រាប់អ្នកកាសែតថា លោកមិនមានការព្រួយបារម្ភទេ អំពីលទ្ធភាពនាំចេញអង្ករឲ្យបានជាង ១លានតោននៅឆ្នាំ២០១៥នោះ។ លោកពន្យល់ថា៖ «អង្ករត្រូវបាននាំចេញចំនួនពី ២០ម៉ឺនតោនរួចស្រេចទៅហើយ ...នៅឆ្នាំ២០១២ នឹងត្រូវមកដល់នៅឆ្នាំនេះ និងកើនទ្វេដង (៤០ ម៉ឺនតោន)។ ខ្ញុំនិងសហការីខ្ញុំសុទិដ្ឋិនិយមណាស់ក្នុងការនាំចេញអង្ករចំនួនជាង ១លានតោននៅឆ្នាំ២០១៥ នៅពេលខាងមុខនេះ ដោយសារឥឡូវនេះមានគេចុះមកបណ្ដាក់ទុន ការបង្កើតរោងម៉ាស៊ីនកិនស្រូវនេះកាន់តែច្រើនឡើង។ អញ្ជើញតាមផ្លូវជាតិលេខ២ក្តី តាមផ្លូវជាតិលេខ៣ក្តី ...រោងម៉ាស៊ីនកិនស្រូវកំពុងតែកើនច្រើនណាស់។ ឆ្នាំ២០១៥នេះ ប្រាកដណាស់នឹងមានអង្ករជាង ១លានតោនសម្រាប់នាំចេញ»។ ទាក់ទងនឹងវិស័យកសិកម្មនេះដែរ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក គិត សេង បានមានប្រសាសន៍ថា កសិករខ្មែរនៅខ្វះការយល់ដឹងអំពីបច្ចេកទេសទំនើបក្នុងការដាំដុះស្រូវ និងខ្វះការយល់ដឹងអំពីស្រូវពូជចំនួន ១០ប្រភេទនៅឡើយ។ លោក គិត សេង៖ «សហគមន៍កសិកម្មចំនួន ៣៧៣ នៅពុំមានសមត្ថភាពគ្រប់គ្រងរឹងមាំធនធានហិរញ្ញវត្ថុមានតិចតួច និងការផ្ដល់សេវាជូនសមាជិកមានកម្រិត។ បណ្ដាស្ថានីយពិសោធន៍ មណ្ឌលអភិវឌ្ឍន៍កសិកម្ម មានដំណើរការរអាក់រអួលដោយសារធនធានមានកម្រិត។ សេវាផ្សព្វផ្សាយកសិកម្មនៅថ្នាក់មូលដ្ឋាន នៅថ្នាក់ស្រុកនៅទន់ខ្សោយនៅឡើយ ដោយសារកង្វះមន្ត្រី និងធនធានហិរញ្ញវត្ថុ។ ការអនុវត្តផលិតកម្មកសិកម្មតាមកិច្ចសន្យាមិនទាន់ដំណើរការ។ ការរៀបចំកំណត់តំបន់ដាំដុះ និងការកសាងផែនទីប្រើប្រាស់ដីកសិកម្ម មិនទាន់បានអនុវត្តបានពេញលេញ»។ បច្ចុប្បន្នក្រសួងកសិកម្ម រុក្ខាប្រមាញ់ និងនេសាទ កំពុងតែជំរុញឲ្យកសិករខ្មែរប្រើប្រាស់ស្រូវពូជចំនួន ១០ប្រភេទ ដើម្បីបង្កើនទិន្នផលស្រូវឲ្យបានច្រើនក្នុងនោះមាន ស្រូវធ្ងន់ប្រភេទរាំងជ័យ ខា៤ និងខា៦។ ស្រូវកណ្ដាលប្រភេទផ្ការំដួល ផ្កាច័ន្ទសែនស និងផ្កាល្មៀត និងស្រូវស្រាលប្រភេទអីអែរ (IR) ៦៦ សែនពិដោរ និងផលសា។ ស្រូវពូជចំនួន ១០ប្រភេទនេះ ត្រូវបានអ្នកជំនាញខាងកសិកម្មបានបញ្ជាក់ថា ជាប្រភេទស្រូវផ្តល់ទិន្នផលខ្ពស់ និងធន់នឹងជំងឺ។ ប្រទេសកម្ពុជា មានផ្ទៃដីធ្វើស្រែនៅរដូវវស្សាចំនួនជាង ២,៥លានហិកតារ និងផ្ទៃដីធ្វើស្រែនៅរដូវប្រាំងចំនួនជាង ៤សែនហិកតារ។ ជាមធ្យមកសិករខ្មែរផលិតស្រូវបានចំនួនជាង ៣តោនក្នុងមួយហិកតារ៕ | |
| ប្រភពពត៌មាន សុខ សេរី -វិទ្យុអាស៊ីស៊េរី | ភ្នំពេញ(សូមបងប្អូនជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។) |
Tuesday, April 10, 2012
ផលស្រូវកម្ពុជាក្នុងឆ្នាំ២០១១ បានជាង ៨,៧លានតោន Popzone News | Money
ផលស្រូវកម្ពុជាក្នុងឆ្នាំ២០១១ បានជាង ៨,៧លានតោន Popzone News | Money
Subscribe to:
Post Comments (Atom)
No comments:
Post a Comment